Afrikaans: 'n Bykans perfekte ring van warm, blou sterre omwentel die geel kern van 'n ongewone ringsterrestelsel bekend as Hoag se Voorwerp. Hierdie beeld van NASA se Hubble-ruimteteleskoop vergun ons 'n gesig wat meer detail van die voorwerp onthul as enige foto tot nog toe. Die beeld kan leidrade aan sterrekundiges verskaf vir ontrafeling van die ontstaansproses van so 'n vreemde voorwerp.

Die hele sterrestelsel is sowat 120 000 ligjaar wyd, wat naamlik effens groter as die Melkweg is. Die blou ring, wat oorheers word deur opeenhopings van jong, massiewe sterre, staan in sterk kontras met die geel kern van meestal ouer sterre. Die skynbare gaping tussen hierdie twee sterbevolkings kan egter wel 'n paar stergroepe bevat wat amper te vaag is om te sien. Vreemd genoeg kan 'n voorwerp in die een-uur-posisie van die gaping gesien word wat 'n treffende ooreenkoms met Hoag se voorwerp toon. Die voorwerp is waarskynlik 'n agtergrond-sterrestelsel.

Ringvormige sterrestelsels kan op verskillende maniere ontstaan. Een moontlike scenario is 'n botsing met 'n ander sterrestelsel. Soms beweeg die tweede sterrestelsel deur die eerste, wat 'n "spatsel" van stervorming agterlaat. Maar in Hoag se Voorwerp is daar geen teken van 'n geskikte tweede sterrestelsel nie. Die vermoede bestaan dan dat die blou ring van sterre die verskeurde oorblyfsels kan wees van 'n sterrestelsel wat verbygeskram het. Sommige sterrekundiges beraam dat die ontmoeting ongeveer 2 tot 3 miljard jaar gelede plaasgevind het.

Hierdie ongewone sterrestelsel is in 1950 deur die sterrekundige Art Hoag ontdek. Hoag het die rookringagtige voorwerp vir 'n planetêre newel aangesien, d.w.s. die gloeiende oorblyfsels van 'n sonagtige ster. Hy het hierdie moontlikheid egter vinnig in twyfel getrek en die vermoede uitgespreek dat die geheimsinnige voorwerp 'n sterrestelsel kan wees. Waarnemings in die 1970's het hierdie voorspelling bevestig, hoewel etlike besonderhede van Hoag se sterrestelsel steeds 'n raaisel bly.

Die sterrestelsel is 600 miljoen ligjare weg in die konstellasie Serpens Caput, d.i. die Slang se Kop. Die Hubble-ruimteteleskoop se Wide Field and Planetary Camera 2 het hierdie beeld op 9 Julie 2001 geneem.